नेपाली शेयर न्यूज । नेपाल स्टक एक्सचेन्ज (नेप्से) सोमबार ३.०२ अंकले घटेर २६०६ मा कायम भएको छ । सोमबारसम्म आइपुग्दा बजार लगातार छैटौं कारोबार दिन ओरालो लागेको हो । विगत ६ दिनमा नेप्से १७० अंकले घटिसकेको छ । मंसिर ११ गते नेप्से २७७६ अंकमा थियो ।
राजनीतिक अस्थिरता र चुनावको अनिश्चितताबीच शेयर बजार लगानीकर्तामा मनोबल बढ्न सकेको छैन । सोमबार बजारमा ९९ कम्पनीको मूल्य बढ्दा १४७ को घट्यो भने १२ कम्पनी स्थिर रहे। कारोबार रकम ४ अर्ब ६६ करोड पुगेको छ, जुन अघिल्लो दिनको ५ अर्ब ३३ करोडको कारोबारभन्दा कम हो ।
समूहगत सूचकमा मिश्रित प्रतिक्रियासहित उतारचढाव १ प्रतिशतभन्दा कम देखियो । जलविद्युत् ०.१२%, जीवन बीमा ०.५०%, उत्पादन तथा प्रशोधन ०.६१%, निर्जीवन बीमा ०.०५% र व्यापार ०.४१% ले बढे। बैंकिङ ०.६७%, विकास बैंक ०.११%, फाइनान्स ०.५७%, होटल तथा पर्यटन ०.२३%, लगानी ०.१६%, माइक्रोफाइनान्स ०.२९% र अन्य ०.२१% ले घटेका छन् ।
प्राविधिक विश्लेषण
सोमबार सेयर बजारले ट्रेन्ड लाइनको आसपास आएर डोजी क्यान्डल बनाएको छ । बजार सपोर्ट (डिमाण्ड) क्षेत्रमा आएपछि डोजी क्यान्डल बनेकोले, सम्भावित रिभर्सलको संकेत देखिएको छ । तर बजारले साँच्चै रिभर्सल देखाएको छ भन्नको लागि डोजी क्यान्डलको हाइ पोइन्ट २६१८ ब्रेक गर्न आवश्यक छ ।
यदि बजारले २६१८ को हाइ ब्रेक गर्न सफल भयो भने, डोजी क्यान्डल मान्य हुन्छ र त्यसपछि बजारले रिभर्सल देखाएको भन्न सकिन्छ । तर यदि यो स्तर ब्रेक भएन भने, बजारले २५८०–२६०० को जोनबाट अर्को कुनै बुल्स क्यान्डल बनाएर त्यसको हाइ ब्रेक गर्नुपर्ने हुन्छ । त्यसपछि मात्र बजारले फर्किएको (रिभर्सल भएको) संकेत दिनेछ ।
ओभरल ट्रेन्ड हेर्दा हाल पनि बजार सकारात्मक छ र बजार ट्रेन्ड लाइनतर्फ आउँदैछ । सोमबारको डोजी क्यान्डलले डिमाण्ड एरियामा रहेको समर्थनलाई हाइलाइट गरेको छ, र आगामी दिनहरूमा बजारको दिशा डोजी क्यान्डलको हाइको ब्रेकमा निर्भर रहनेछ ।
