सानिमा रिलायन्स लाइफ इन्स्योरेन्स लिमिटेडले आफ्नो ९औँ वार्षिक साधारण सभा (AGM) २०८२ साल पुस २४ गते काठमाडौँको गोल्फुटारस्थित शुभ इभेन्ट्समा सफलतापूर्वक सम्पन्न गरेको छ। सभाको अध्यक्षता कम्पनीका अध्यक्ष रतनलाल केडियाले गरेका थिए।
सभामा आर्थिक वर्ष २०८१/८२ को वार्षिक प्रतिवेदन, लेखापरीक्षित वित्तीय विवरण तथा खाताहरू प्रस्तुत भई शेयरधनीहरूबाट सर्वसम्मत रूपमा स्वीकृत गरिएको थियो।
यस अवसरमा कम्पनीले आफ्ना शेयरधनीलाई कुल रु. ५१ करोड ४ लाख १८ हजार ९७० (करसहित) बराबरको १०.१७८० प्रतिशत नगद लाभांश वितरण गर्ने प्रस्ताव पारित गरेको छ। उक्त लाभांश कम्पनीको रु. ५ अर्ब १ करोड ४९ लाख २४ हजार ५६ रुपैयाँ चुक्ता पूँजीको आधारमा गणना गरिएको हो।
त्यस्तै, आगामी आर्थिक वर्षका लागि लेखापरीक्षकको नियुक्ति र निजको पारिश्रमिकसम्बन्धी प्रस्ताव पनि सभाले अनुमोदन गरेको छ।
सभामा कम्पनीका प्रमुख कार्यकारी अधिकृत (CEO) शिवनाथ पाण्डेले कम्पनीका पछिल्ला उपलब्धिहरू प्रस्तुत गर्दै बलियो कर्पोरेट गभर्नेन्स, ग्राहक केन्द्रित सेवा, शाखा सञ्जालको विस्तार, सूचना प्रविधिको प्रभावकारी प्रयोग, आन्तरिक नियन्त्रण प्रणाली, लागत व्यवस्थापन, कर्मचारी उत्साह र अभिकर्ता (एजेन्ट) सशक्तीकरणमा कम्पनीले उल्लेखनीय प्रगति गरेको बताए।
उनले मर्जरपछिका चुनौतीहरूलाई सफलतापूर्वक सामना गर्दै सानिमा रिलायन्स लाइफ इन्स्योरेन्सले नेपाली बीमा बजारमा सम्मानित र विश्वासिलो स्थान बनाउन सफल भएको पनि उल्लेख गरे।
कार्यक्रमको अन्त्यमा अध्यक्ष रतनलाल केडियाले शेयरधनी, नियामक निकाय, संस्थागत साझेदार, अभिकर्ता, बीमित ग्राहक, सञ्चार माध्यम तथा सम्पूर्ण कर्मचारीप्रति धन्यवाद ज्ञापन गर्दै कम्पनीको निरन्तर सफलताका लागि सबैको सहयोग अपरिहार्य रहेको बताए।
