Nepali Share News l

शिखर पावर डेभलपमेन्ट लिमिटेडको आईपीओ पर्खिरहनुभएका लगानीकर्ताहरूका लागि एउटा महत्वपूर्ण खबर छ। कम्पनीले फागुन १७ देखि २६ गतेसम्म सर्वसाधारणका लागि खुला गरेको सेयरको आज (मंगलबार) बाँडफाँड सम्पन्न गरेको छ।

यस पटक पनि आईपीओमा आवेदन दिनेहरूको संख्या निकै ठूलो देखिएको छ। कुल २६ लाख ८७ हजार ३४७ जनाले आवेदन दिएकोमा केही प्राविधिक कारणले ३६ हजार ५०० जनाको आवेदन रद्द भएको छ। बाँकी २६ लाख ५० हजार ८४७ जना योग्य आवेदकहरूलाई मात्र गोलाप्रथामा सहभागी गराइएको थियो।

कसले कति पाए त सेयर?

मागभन्दा धेरै गुणा बढी आवेदन परेका कारण यस कम्पनीको आईपीओ पनि गोलाप्रथाकै माध्यमबाट बाँडफाँड गरिएको हो। यस प्रक्रियाबाट भाग्यमानी १ लाख ८४ हजार २६० जनाले मात्र जनही १० कित्ताका दरले सेयर प्राप्त गरेका छन्। सर्वसाधारणका लागि छुट्याइएको कुल १८ लाख ४२ हजार ६०० कित्ता सेयर यी सीमित व्यक्तिहरूमा बाँडिएको हो।

दुर्भाग्यवश, आवेदन दिएकामध्ये ठूलो हिस्सा अर्थात् २४ लाख ६६ हजार ५८७ जना लगानीकर्ताको हात भने यसपटक रित्तिएको छ।

शिखर पावरले यसअघि नै वैदेशिक रोजगारीमा रहेका नेपाली र आयोजना प्रभावित स्थानीयका लागि सेयर निष्काशन गरी बाँडफाँड गरिसकेको थियो। दोस्रो चरणमा सर्वसाधारण, सामूहिक लगानी कोष र कर्मचारीका लागि यो अवसर खुल्ला गरिएको थियो।