नेपाली शेयर न्यूज/ डेढ वर्षदेखि रोकिएको रिलायन्स स्पिनिङ मिल्सको प्राथमिक सार्वजनिक निष्कासन (आईपीओ) प्रक्रिया अघि बढेको छ । नेपाल धितोपत्र बोर्डले आईपीओ निष्काशनको अनुमतिदिए सँगै १ अर्ब ७० करोड पुँजी भएको रिलायन्स स्पिनिङ मिल्सले आईपीओ ल्याउने भएको छ ।
आईपीओ निष्कासनको अनुमतिदिएसँगै नेपालको प्रमुख निर्यात मूलक उद्योग रिलायन्स अब नेपाल स्टक एक्सचेन्ज (नेप्से)मा सूचीकृत हुने भएको हो । निष्काशन तथा विक्रीप्रबन्धक ग्लोबल आइएमई क्यापिटल लिमिटेडलाई पत्र लेख्दै ‘सम्मानीत उच्च अदालत पाटनको परमादेशको आदेश अनुसार रिलायन्स स्पिनिङमिल्स लिमिटेडको साधारण शेयरको निष्काशन कार्य अघि बढाउन’ भनेको छ ।
यसअघि २०८१ असार १२ मा आईपी ओनिष्काशनको लागि बोर्डबाट स्वीकृति प्राप्त भएपनि रोकिएको थियो । त्यसविरुद्ध रिलायन्स स्पिनिङ मिल्स परमादेशको आदेश माग गर्दै उच्चअदालत पाटन पुगेको थियो । रिलायन्स स्पिनिङमिल्स गोल्याण ग्रुपको प्रमुख उद्योग हो । २०५४ मा स्थापित उद्योगले पछिल्लो समय उत्पादन र नाफामा उल्लेख्य सुधार गर्दै आएको छ ।
कम्पनीद्वारा सार्वजनिकवार्षिक वित्तीयविवरण अनुसार गत आर्थिक वर्ष २०८१/८२ मा १ अर्ब ४८ करोड रुपैयाँ नाफाआर्जन गरेको जनाएको छ । उद्योगले अन्तर्राष्ट्रिय बजारमा समेत विशिष्ट पहिचान स्थापित गर्न सफल भएको छ । उद्योग तथा वाणिज्य क्षेत्रबाट राष्ट्रिय अर्थतन्त्रमा महत्वपूर्ण योगदान गरेको भन्दै नेपाल सरकारले गत असारमा स्पिनिङ मिल्सका नेतृत्वकर्ता अक्षयलाई ‘महत्वपूर्ण वर्ष व्यक्ति’ (सीआईपी) बाट सम्मान गरेको थियो ।
९ हजार स्पिन्डल क्षमताबाट सुरु भएको रिलायन्स स्पिरिङ मिल्स हाल १ लाख २ हजार ८ सय २४ स्पिन्डलको जडित क्षमता सहित सञ्चालन भइरहेको छ । सुनसरीको खनार र दुहबीमा उद्योगका दुईवटा धागो कारखाना रहेका छन् । उद्योगले कपास, पोलिस्टर, भिस्कोज, एक्रेलिक र टेक्सचर्ड यार्न उत्पादन गर्दै आएको छ । रिलायन्सका उत्पादनहरु नेपालभित्र खपत हुनुका साथै भारत, टर्कीलगायत देशमा निर्यात हुने गरेका छन् । वार्षिक ५ करोड अमेरिकी डलर बराबरको निर्यात हुन्छ ।
