नेपाली शेयर न्यूज/ बुधबार शेयर बजारमा कारोबार बढेसँगै नेप्से परिसूचक पनि उकालो लागेको छ । अघिल्लो दिनको तुलनामा नेप्से ९.६१ अंकले बढेर २६६५ विन्दुमा पुगेको छ । यससँगै बजार लगातार चार दिन उकालो लागेको छ । चार दिनमा नेप्से सूचक करिब १०५ अंकले बढिसकेको छ । कारोबार रकम पनि उक्लिएको छ । अघिल्लो दिन ५ अर्ब ८२ करोडको कारोबार भएकोमा बुधबार ६ अर्ब ६९ करोड रुपैयाँ बराबरको कारोबार भएको छ ।
यस्तो छ टेक्निकल पक्ष
बुधबार क्यान्डल, ट्रेन्डलाइन र प्राइस–एक्सन तीनवटैबाट बाइ सिग्नल देखिएको छ । बजारको क्यारेक्टर अहिले पनि सकारात्मक र बुलिश क्रममा नै छ । क्यान्डलमा देखिएको माग, ट्रेन्डलाइनको समर्थन र क्यारेक्टर चेन्ज प्वाइन्टले पनि बजारलाई उकालोतर्फै संकेत गरिरहेको छ । त्यसैले बजारको गति अहिले पनि माथिल्लो ट्रेन्डमै रहेको बुझिन्छ ।
बजारको नजिकैको मुख्य रेसिस्टेन्स भनेको २,६८८ को विन्दुमा छ, जहाँबाट बजारले केही प्रतिक्रिया दिन सक्छ । यस विन्दुमा बजार रोकिएको झैँ देखिए पनि तल रहेको हरियो ट्रेन्डलाइनमा आधारित सपोर्ट भंग नभएसम्म बजारको बुलिश स्वरूपमा खासै असर नपर्ने देखिन्छ । दोस्रो प्रमुख रेसिस्टेन्स २,८२४ को आसपास रहेको छ, जुनपछि बजार अझै बलियो गतिमा अघि बढ्न सक्ने सम्भावना देखिन्छ ।
लगभाग २३ महिनापछि बनेको यो रेसिस्टेन्स जोन बजारका लागि महत्वपूर्ण मोड बन्न सक्छ । त्यसैले २,६८८ को दायरामा आउने उतार–चढावलाई सावधानीपूर्वक हेर्नुपर्ने हुन्छ। तर समग्र ट्रेन्ड भने अझै पनि सकारात्मक नै छ । बुधबारको कारोबारमा लगानीकर्ताको आकर्षण टर्नओभरका आधारमा चार प्रमुख सेकेटरमा बैंकिङ, हाइड्रोपावर, माइक्रोफाइनान्स र उत्पादन तथा प्रशोधनमा देखिएको छ । यी सेक्टरमा उच्च कारोबार भएकोले लगानीकर्ताको ध्यान र रुचि यता बढी केन्द्रित भएको देखिन्छ ।
बुधबार बजारमा १ सय ४२ कम्पनीको मूल्य बढ्दा १०४ कम्पनीको घट्यो र ११ कम्पनी स्थिर रहे । सागर डिस्टिलरी, झापा इनर्जी, स्वस्तिक लघुवित्त र श्रीनगर एग्रिटेकका सेयर १० प्रतिशतसम्म बढे। केही कम्पनीमा भने गिरावट पनि देखियो। बोटलर्स नेपाल बालाजुको सेयर मूल्य ३.९४ प्रतिशतले घट्यो भने उन्नति सहकार्य लघुवित्त, शुभम् पावर र बन्दीपुर केबुलकारमा पनि गिरावट देखियो ।
समग्रमा हेर्दा बजारको क्यारेक्टर सकारात्मक नै छ । क्यान्डल, ट्रेन्डलाइन र प्राइस–एक्सन तीनै आधारमा बाइ संकेत देखिएकोले बजार अझै पनि बुलिश मूडमै रहेको निष्कर्ष निकाल्न सकिन्छ । २,६८८ को रेसिस्टेन्समा केही प्रतिक्रिया आएपनि ट्रेन्डलाइन सपोर्ट नटुटेसम्म बजार उकालोतर्फै रहने सम्भावना बलियो छ ।
